Este Plan de fomento da empregabilidade na provincia de Pontevedra estrutúrase nos seguintes programas de actuación:

a) “O teu primeiro emprego” na Deputación Provincial de Pontevedra

b) “O teu primeiro emprego” nos concellos

c) “O teu primeiro emprego” nas empresas e corporacións sectoriais

d) “O teu primeiro emprego” en organizacións non gobernamentais da provincia de Pontevedra.

As persoas destinatarias das axudas serán as tituladas da provincia de Pontevedra que, ao abeiro deste programa, decidan acollerse ás diferentes convocatorias que se realicen desde a Deputación de Pontevedra.

Concretamente, o programa “O teu primeiro emprego” nas empresas e corporacións sectoriais 2021 da Deputación de Pontevedra desenvolverase en dúas fases:

a) Primeira, de selección das entidades colaboradoras e determinación das titulacións dos postos de traballo que se van desempeñar baixo a modalidade de contrato en prácticas

b) Segunda, de selección das persoas beneficiarias das contratacións en prácticas segundo as bases reguladoras que aprobe a Deputación Provincial.

ENTIDADES COLABORADORAS

Poderán ser entidades colaboradoras das axudas ou subvencións previstas neste programa as pequenas e medianas empresas e as microempresas en calquera das modalidades xurídicas existentes, atendendo á definición establecida pola Comisión Europea (Recomendación 2003/361/CE, de 6 de maio), o empresariado individual e as e os profesionais, as comunidades de bens e as corporacións sectoriais que dispoñan da capacidade técnica e de xestión suficiente para a execución dos correspondentes proxectos e que non incorran nas circunstancias establecidas no artigo 12 da Lei 38/2003, de 17 de novembro, xeral de subvencións (LXS).

Para que se lles concedan as subvencións as entidades colaboradoras deberán cumprir os seguintes requisitos:

1. Ter o seu domicilio fiscal en calquera concello da provincia de Pontevedra

2. Estar legalmente constituídas e ter iniciada a súa actividade

3. A actividade da entidade, definida nos seus estatutos, ten que estar relacionada co perfil profesional da persoa contratada

4. Estar ao corrente no cumprimento das súas obrigas coa Axencia Estatal Tributaria, coa Facenda autonómica, coa Seguridade Social e coa Deputación de Pontevedra

5. Non estar nin ter estado incursas nun expediente de despido improcedente de ningunha persoa traballadora da entidade correspondente, que ocupase un posto similar ao que se solicita nos tres meses anteriores á data de finalización do prazo de presentación de solicitudes, nin en ningunha das circunstancias previstas no artigo 10 da Lei 9/2007, de 13 de xuño, de subvencións de Galicia (LSG).

Cada entidade colaboradora só poderá solicitar un contrato

O prazo de presentación de solicitudes será de 20 días hábiles, contados desde o día seguinte ao da publicación desta convocatoria no BOPPO.

SELECCIÓN DAS PERSOAS BENEFICIARIAS DOS CONTRATOS EN PRÁCTICAS

A Deputación Provincial será a encargada de levar a cabo o proceso de selección das persoas que se contraten mediante a publicación dunha convocatoria pública en función das titulacións requiridas polas entidades colaboradoras seleccionadas.

A selección efectuarase entre as persoas que se inscriban no citado proceso de selección e cumpran os requisitos esixidos para a formalización dun contrato en prácticas e os criterios establecidos nas bases de selección das persoas beneficiarias.

As persoas beneficiarias serán as que elixan, por orde de puntuación, a entidade onde serán contratadas.

https://boppo.depo.gal/web/boppo/detalle/-/boppo/2021/03/12/2021010919